حبك بقلبي بخير

احلى من اني عن احوالـي اعـلـِّمـك

اني ما اطيق السؤال .. الا من شـفاك


حبك بقلبي بخير .. الله يسلِّـمك

والشوق محرق ومغرق ، مثل شرواك


والا الشجن ، في فؤادي ، لو يداهمك

ما تدري وشلون جاك .. و وين ودَّاك


يانور وان جيت والعطر يْتقدمـك

احلى من الكل بعض .. وكلك احلاك


او عطر وان جيتني نورك ملازمك

ممشاك درب القمر ، والحب ملفاك


تلقى الغلا عـلم فاضح .. عند حالمك

ان كان ما تدري انه كله اغلاك


احيان اقول ان حسنك ضد مُغرَمك

مادامها كنها تهواك فرقاك


واحيان اقول ان حسنك حيل ظالمك

خلاك مقصد حسد واكثر من إعداك


ووش عاد لو تنحسد والرب مكرمك

جنبـِّك شـّر الحسد خالق مزاياك


والبارحه حين ظامتني معالمك

في قلب مافيه نبضه ما تمنـَّاك


قلت ازهم الشعر يمطر منك ، وازهمك

تشوف فضلك على الشعر وعطاياك


وسلهمت تقرا النهر ، والسحر سلهمك

وغيـّم بعقل ٍ سماء .. ماطاله إلاَّك


وردّيت لي والعيون الدعج تِلزمك

على السبي .. والغبي من هو تحدّاك


معذور اسلـِّمك ما تطلب .. واسلـِّمك

اللي ما تطلب .. معه ، ان كان مااكفاك


دوِّرني وإيـَّاي .. تكفى .. حين اكلّمك

او تدري ، ما احلى اني افقدني بدنياك


تبي تفهمني ؟ .. وانا ما ودي افهـمك

حتى بزود انفتن بك .. واكثر اهواك


واكتبك ..وارسمك ، في لهفه .. واترجمك

واقراك الى آخرك .. واعيد واقراك